కన్నడ చిత్రసీమకు స్వర్ణయోగం ప్రసాదించిన తెలుగు ప్రతిభ

తెలుగు, తమిళం సినిమాల కంటే మూడు సంవత్సరాలు ఆలస్యంగా 1934లో టాకీయుగ ప్రవేశం చేసి, సుమారు పదేండ్ల క్రిందటి వరకు కేవలం తెలుగు, తమిళ చిత్రాలకు ఉపగ్రహంగా ఉండిపోయిన కన్నడ సినిమా 1966 నుంచి ఒక వ్యక్తిత్వాన్ని సంతరించుకోవడం ప్రారంభించింది. 1971లో 'సంస్కార' చిత్రంతో విప్లవ శకంలో అడుగుపెట్టి, అప్పటి నుంచి పెద్ద పెద్ద అంగలు వేసుకుంటూ పురోగమించి నాణ్యంలో తెలుగు, తమిళ చిత్రాలనేకాక, హిందీ, మలయాళ చిత్రాలను, మొదటి నుంచి ప్రతిభకు పెట్టింది పేరుగా ఉన్న బెంగాలీ చిత్రాలను కూడా దాటిపోయింది కన్నడ సినిమా.